“A lavannera“, componimento in dialetto coriglianese di Luigi Visciglia.
mercoledì 21 febbraio 2018 11:41
A LAVANNERA 18 febbraio 2018 A ru Funnichi steva Zà Lucia a lavannera, mpacci u tabacchini i Zù Gangiuli i Gajeni. Scinnivi quattri o cinchi scaluni e ccìera ra porta sua, na chesicella piccula e pulita; ghilla ghera na vecchierella arzilla, anureta e rispitteta e tutti a ru vicinanzi cci vulijini beni. Zà Lucia! L’aveva i nzoni a ri signuri cà cherini puliti i fori e zallarusi i ntra l’arma; laveva e stricheva chilli rrobbi ma a lurdia c’avijini i ntra l’arma rimania mbracchjieta a ri linzoli e manchi cu ru putassi si nni jiva. Ricujiva linzoli e tuvaghji facia na truscia e supa a chepa sa mintia, jiva ntra spissa i ru cofarone a feri a vucheta e ppù i laveva a ra jumera. U Curghianiti! Ghera sempre n’armunia ccù strusci e canti, ccerini tanti lavanneri, chini stricanni e sciacquanti canteva: Ciangini i signuri e ririni i garzuni quanni i ru cieli chiovini crustuli e culluri. Canta armia mia sbindureta stà mala sorta chi mi ghè capiteta ccà ppi miseria fazzi a lavannera ppi mi ghinchjiri stà trippa e senza sapuri. L’acqua azzangheta i ra lurdia libira arriva a ru meri e ghjia rimagni ncatineta a chista petra a mi ranneri. Santu Sassi e Santu Simuni ristruggiti sti signuri. L’acqua scinni adduvi ghè ra pinnenza e l’uomi canta adduve ghè ra spiranza. Spiranza! Nnù cci nnè i ntra jumera”. Guni ccà passa a sputta cantanni: “Lavannera chi lavi sti panni, l’acqua ti passa sutti a sti gammi, lavannera chi lavi quazuni, l’acqua ti passa suttu u p…”. Ccù raggia rispunnija: “Jaccheti, muorti ammazzeti, chi ti vò ppi jieri a pirrema, chi ti vò ristruggiri cumi i piretti i ru cofarone”. A raggia e ru gabbuliamenti venini i ra miseria.
			Luigi Visciglia
Visualizza in pdf